راپۆرت

لە یادی سەردەشتدا .. “زیاد لە کارخانەیەك هەیە رووداوەکانمان بیر دەباتەوە”

دەنگی کورد 

رەنگە هەرێمی کوردستان یەكێك بێت لەو ناوچە سەختانەی کارکردن تیایدا گران بێت بۆ رۆژنامەنوسان، ئەوەی کە دەشێت ئەم کارەی گرانتر کردبێت بینینی ئەو روداو و  پێشێلکارییانەیە بەرانبەر رۆژنامە نووسان ئەنجام دەدرێت و تیایدا بکەرەکانیان دەرباز دەبن لە سزای یاسا و لێپێچینەوە.

هەشت ساڵ لەمەوبەر، لەبەردەم پرسگەی زانکۆی سەڵاحەدین لە شاری هەولێر بە بەرچاوی خەڵك و پاسەوانانی پرسگەی زانکۆوە رۆژنامەنوس( سەردەشت عوسمان )  لەلایەن تاقمێکی چەکدار بەزۆر راپێچی نێو سەیارە کرا و رفێندرا، دوایی دوو لە شوێنبزرکردنی لە رۆژی( ٥-٥-٢٠١٠) تەرمەکەی لە شاری موسڵ دۆزرایەوە بەدەست بەستراوەیی و فیشەکێك نرابوو بە دەمییەوە.

 

عەزیز رەووف رۆژنامەنووس بەدەنگی کوردی وت:" من دڵنیام لە كوردستاندا زیاد لە كارخانەیەك هەیە رووداوەكانمان بیر دەباتەوە، بەڵام سەردەشت عوسمان لەو كەسانە نیە بیر بچێتەوە. هەموو كارخانەی دنیا بۆ بیرچوونەوە، ناتوانێت ئەم كوڕە گەنجەمان بیر بباتەوە"

لەدرێژەی قسەکانیدا رۆژنامەنووسی ناوبراو وتیشی  "سەردەشت عوسمان لەو مەخلوقانەیە جیاواز جێیهێشتین، جیاواز رۆیشت، بەجۆرێك هەست ناكەین رۆیشتبێت".

بەتەسەوری من دوو رێگە هەیە بۆ مردنی سەردەشت عوسمان، یەكەم: دەبێت ئەو گروپەی لەپشت تیرۆركردنی سەردەشت عوسمانەوە بووە بێت و هەموومان بكوژێت. سەردەشت عوسمان كاتێك دەمرێت كە هەموومان خۆمان بۆ گۆڕەكان ئامادە بكەین، دووەم: سەردەشت ئەوكاتە دەمرێت كە هیواكانمان بمرێت".

پێشەوا عوسمان برای سەردەشت عوسمان بەدەنگی کوردی وت" هەشت ساڵ تێدەپەڕێت بەسەر تیرۆرکردنی سەردەشتدا، بەداخەوە تاکو ئێستا بکەرانی ئەو روداوە بە روونی دیار نین، ئێمە داواکارین بکوژانی بە سزای خۆیان بگەن، هەر لە سەرەتای تیرۆرکردنی سەردەشتەوە چەندین هەڕەشەو گوڕەشەمان لەسەر بووە، ئێمە تەنها ئەوە دەڵێین کە بکوژانی سەردەشت بەسزای عادیلانەی خۆیان بگەن و هیچی دیکە".

بەشێکی زۆر لە رۆژنامەنووسان و چاودێران پێیان وایە کە زۆربەی کەیسی رۆژنامەنووسان لێڵ دەکرێت و بەڕوونی تاوانبارانی روداوەکە دەستنیشان ناکرێت، ئەمە لەکاتێکدایە کە لە رابردوودا  چەندین رۆژنامەنووسی دیکەش تیرۆرکراون، بەڵام تاوانباری سەرەکی روداوەکان نادۆزرینەوە، ئەمەیش بێمتمانەی رۆژنامەنووسان و کەسوکاریانی لەگەڵ هێزە ئەمنیەکاندا لاواز کردووە.

عەبدولخالق تەڵعەت، بەڕێوبەری پۆلیسی  هەولێریش لەو بارەیەوە بەدەنگی کوردی راگەیاند: " هەر لەدوای تیرۆرکردنی سەردەشت عوسمانەوە کاتی خۆی تاوانبارانی ئاشکرا کران، بەڵام زۆر کات میدیا خۆی شتەکان ناڕوون دەکات و هەر شتێك هەبێت راستەوخۆ دەڵێن بەهۆی کاری رۆژنامەنووسیەوە بووە، بەڵام بێ ئاگا لەوەی پێدەچێ بەشێکیان کێشەی دیکەی کۆمەڵایەتیان هەبێت، بەڵام سەردەشت عوسمان کێشەی کۆمەڵایەتی نەبوو، ئێمەیش هەمیشە کارمان کردووە بۆ ئەوەی یاسا سەروەر بێت".

سەردەشت عوسمان لەساڵی ١٩٨٧ لەدایك بووە، ٥ی ئایاری ٢٠١٠ تیرۆرکرا، رۆژنامەنووس و خوێندکاری دوا قۆناغی بەشی زمانی ئینگلیزی کۆلێژی ئاداب بوو لە زانکۆی سەلاحەدین لە ھەولێر، لە رۆژی ٣ی ئایاری ٢٠١٠ لە بەردەم زانکۆکەیدا،  نزیك کاتژمێر ٨:٠٠ی بەیانی رفێندرا لەلایەن چەند کەسێکی نەناسراوەوە، پاش دوو رۆژ، تەرمەکەی بە قۆڵبەستراوی لە مووسڵ دۆزرایەوە

زیاتر پیشان بدە

بابەتی پەیوەندیدار

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *