عێراقهەواڵی

عێراق: رێژەی بەشدارییکردنی دەنگدەران ٤٤،٥٢ بووە

دەنگی کورد

ئێوارەی رۆژی شەممە ١٢ی ئایار، کۆمیسیۆنی باڵای سەربەخۆی هەڵبژاردنەکانی عێراق رایگەیاند، رێژەی بەشدارییکردنی زۆر کەمتر بووە لەوەی چاوەڕوان دەکرا کە گەیشتە(٤٤،٥٢ ٪)، بەمەیش عێراق کەمترین رێژەی بەشدارییکردنی دەنگدەرانی تۆمار کرد لە پاش روخانی رژێمی سەدام لە ساڵی ٢٠٠٣ ەوە، بڕیاریشە لە ماوەی دوو تا سێ رۆژ ئەنجامی سەرەتایی هەڵبژاردنە پارلەمانییەکەی عێراق رابگەیەنرێت.

رۆژی شەممە ١٢ ئایار دەرگای بنکەکانی دەنگدان بەڕووی دەنگدەراندا کرایەوە، بۆ یەکەمین هەڵبژاردنی پاش راوەدونانی رێکخراوی(دەوڵەتی ئیسلامی) لە وڵاتەکەدا.

ئەوەی دەرکەوت لەم هەڵبژاردنەدا ئەوە بوو کە دەنگدەران پێدەچێت ئامادە نەبووبن متمانەی خۆیان نوێ بکەنەوە بەو توێژە سیاسیەی کە پێشتر تۆمەتبار کراون بە گەندەڵی و بێبەڵێنی لە ماوەی ١٥ ساڵی رابردودا، رێژەی بەشداربوون گەیشتە ٤٤،٥٢ لە سەدا، لە کۆی ٢٤،٥ ملیۆن دەنگدەر بۆ هەڵبژاردنی ٣٢٩ نوێنەری ئەنجومەنی نوێنەرانی داهاتوو، کۆمیسیۆن رایگەیاند کە"١٠٨٤٠٩٨٩ کەس بەشداری کردوە لە دەنگدەری تایبەت و تاراوگەنشین و گشتیییەکان".

ئەم رێژەیەیش بە کەمترین هەژمار دەکرێت پاش روخانی رژێمی سەدام لە پاش داگیرکردنی عێراق لەلایەن ئەمەریکاوە، لە یەکەمین هەڵبژاردنی عێراقی پاش حیزبی بەعس ساڵی ٢٠٠٥ رێژەی ٧٩٪ی دەنگدەران بەشداریان کرد، ساڵی ٢٠١٠ رێژەی ٦٢،٤٪ بەشداری هەبووە، لە ساڵی ٢٠١٤ رێژەکە دابەزیوە بۆ ٦٠٪، هەر بۆیە ئەم هەڵبژاردنە بە کەمترین رێژەی بەشداری هەژمار کراوە بەڕێژەی بەشدارییکردنی ٤٤،٥٢٪

ئەم دەنگدانە لە کاتێکدا ئەنجام درا کە ناوچەکە ئاڵۆزییەکی ئیقلیمی تیادایە، چونکە عێراق وەکو خاڵی بەیەکگەیشتنی دوو دوژمنی مێژوویی دادەنرێت، ئێران و ئەمەریکا، تاران کاریگەری سیاسی گەورەی هەیە بەسەر لایەنە شیعییەکان و هەندێك پێکهاتەی دیکە، لەلایەکی دیکەوە واشنتۆن رۆڵی گەورەی گێڕا لە سەرکەوتن بەسەر رێکخراوی(دەوڵەتی ئیسلامی)دا.

چاوەڕوان دەکرێت ئەنجامی سەرەتایی هەڵبژاردنەکە لە ماوەی دوو تا سێ رۆژی دیکە رابگەیەنرێت لە پاش دەنگدانەکەوە.

زیاتر پیشان بدە

بابەتی پەیوەندیدار

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *