عێراقکوردستانهەواڵی

یەکێتی نیشتمانی بانگەوازێك بڵاو دەکاتەوە لە کەرکوك

دەنگی کورد

مەڵبەندی دووی رێکخستنی کەرکوکی یەکێتی نیشتمانی کوردستان، بانگەوازێك ئاڕاستەی دەسەڵاتی سەپاندنی یاسا دەکات لە کەرکوك، بەهۆی زیادەڕۆیی و پێشێلکاریی و دەستدرێژییکردنە سەر هاوڵاتیانی کورد، لەلایەن میلیشیا عەرەبی و تورکمانییەکانی شارەکە.

لەو بانگەوازەی مەڵبەندی کەرکوکی یەکێتی نیشتمانی ئەمڕۆ ١٥ی ئایاری ٢٠١٨ بڵاو کراوەتەوە، بەناوی یەکێتی نیشتمانی کوردستانەوە، داوا لە دەسەڵات دەکات کە بەشێك لە میلیشیا چەکدارەکان و حیزبە توندڕەوە ناکوردییەکان، دەستدرێژیی دەکەنە سەر کارمەندە کوردەکانی کۆمیسیۆنی باڵای هەڵبژاردنەکانی کەرکوك و هەڕەشەیان لێدەکەن.

لە بانگەوازنامەکەدا ئەوەیش هاتووە، کە لە بەشێك لە فەرمانگە فەرمییەکانی شارەکە دەستدرێژی دەکرێتە سەر هاوڵاتیانی کورد، هەر بۆیە وەکو نوسراوە"ئەگەر دەسەڵاتە ئەمنییەکان رێوشوێنی گونجاو نەگرنە بەر بۆ بنبڕکردنی ئەو توندڕەوی و فەوزایە کە لە سایەی سەپاندنی یاسا لەلایەن حکومەتەوە دەکرێت، ئەوە ئێمە شەقامی کوردی دەجوڵێنین بۆ پاراستنی هاوڵاتیانمان لە شارەکە".

لە کۆتایی بانگەوازەکەدا هاتووە" بەرپرسیارێتی پاشهاتەکانی شەقامی کوردی لە ئەستۆ ناگرین، ئەو فەوزا و پێشێلکاریانە ئیدانە دەکەین کە بەشێك لە حیزبە تورکمانییەکان و عەرەبییەکان و میلیشیا چەکدارە بێ مۆڵەتەکان ئەنجامی دەدەن".

شایەنی باسە رۆژی ١٢ی ئایار لە چەندین بنکەی دەنگدانی شارەکە میلیشیا چەکدارە تورکمانەکان دەستدرێژیان کردوەتە سەر هاوڵاتیانی کورد و رێگەیان لێگرتوون کە بەشداری بکەن، شایەتحاڵێك بە دەنگی کوردی راگەیاند، لە یەکێك لە بنکەکانی دەنگدان، هێزێکی نایاسایی لە سەرەی دەنگدەراندا، کەسێکیان دەستگیر کردوە بەبیانووی ئەوەی گوایە هاوکاری پەکەکە دەکات لە رفاندن و کوشتنی خەڵك لە شاری کەرکوك، ئەو کەسە پێشتر پێشمەرگەی یەکێتی نیشتمانی کوردستان بووەو بەشداری شەڕی داعشی کردوە لە چەندین میحوەری دەوروبەری کەرکوك، دواتر بە هەوڵی مەڵبەندی کەرکوك و کەسایەتییەکانی یەکێتی توانیویانە دەربازی بکەن لە دەست ئەو میلیشیانە.

زیاتر پیشان بدە

بابەتی پەیوەندیدار

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *