عێراقهەواڵی

تەڵال زەوبەیعی: سوتاندنی كۆگاكانی كۆمسیۆن كارێكی بەرنامە بۆ داڕێژراوبووە

دەنگئ کورد

تەڵال زەوبیعی سەركردە لەلیستی هاوبەندی بڕیاری عێراقی‌و سەرۆكی لیژنەی نەزاهە لەئەنجوومەنی نوێنەرانی عێراق، دەڵێت: سوتاندنی كۆگاكانی كۆمسیۆن كارێكی بەرنامە بۆ داڕێژراوبوو، بەڵگەیەكی دڵنیاكەرەوە بوو، كە "ساختەكاران و گەندەڵكاران لەدوای هەمواركردنی یاسای هەڵبژاردنەكان و بڕیاری جیاكردنەوەی دەنگەكان هەموو لاپەڕەكانیان هەڵدرایەوە ئیتر ڕێگەیان نەمایەوە چوون ئەو كۆگایانەیان سوتاند".

تەڵال زەوبیعی، دەشڵێت: ئەم كارە ئەگەری هەیە سەرتاسەری عێراق بەهەرێمی كوردستانیشەوە بگرێتەوە، چونكە ساختەكاران و گەندەڵكاران هەموویان یەك ڕەفتار‌و بیركردنەوەی هاوبەشیان هەیە.

ئەو قسانەی تەڵال زەوبیعی لەمیانی گفتوگۆیەك بووە لەگەڵ دەنگی ئەمریكا، كە لەبارەی ئاگركەوتنەوە لە یەكێك لە كۆگاكانی كۆمسیۆن لەناوچەی ڕەسافەی بەغدا وتی: "بەدڵنیایەوە ئەم ئاگربەردانە كۆگایانەی كۆمسیۆن كاری ساختەكاران‌و گەندەڵكاران بوو، ئەمە كۆتا هێڵی جیاكراوەبوو لەنێوان ئەوانەی گومانیان هەبوو ، ئەوانەی گومانیان نەبوو لەسەر ساختەكارییەكانی هەڵبژاردن، چونكە ئەمە بەڵگەیەكی دڵنیاكەرەوەیە، كە ساختەكاران ئەم كارەیان كردووە، بەتایبەت لەدوای هەمواركردنی یاسای هەڵبژاردنەكان و بڕیاری ئەژماركردن و جیاكردنەوەی دەنگەكان بەدەست، ئیتر لاپەرەكانیان هەڵدەدرایەو و ئاشكرا دەبوون لەناوخۆ و دەرەوەدا، دواتر ڕۆیشتن ئەو كۆگایانەیان سوتاند، لەكاتێكدا بۆ زانیاریتان ئەو كۆگایانە داخرابوون، بەڵام ساختەكاران و خراپەكاران توانیان ئەو تاوانە ئەنجامبدەن و ئاگر بەربدەنە ئەو كۆگایانە، بەڕاستی ئەمە تاوانێك بوو بەرامبەر مافی گەل."

زەوبیعی لەبارەی دەنگۆی هۆكاری ئاگركەوتنەوەكە بەهۆی شۆرتی كارەبا یا كێشەی تەكنیكی وتی: "نەخێر ئەم كارە ڕێكخراو و بەهەماهەنگی بوو، سودمەندەكان لەم كارە هەموو ئەوانەن، كە كاری جیاكردنەوە و ئەژماركردنەوەی دەنگەكانیان پێناخۆش بوو، ئێمە دەزانین ساختەكاری لەعێراق بەشێوەیەكی بەرنامە بۆ داڕێژرا ئەنجامدرا، كاتێك دكتۆر كاكەیی كارەكانی كۆمسیۆنی ئاشكراكرد، ڕوونكردنەوەیدا، بە بەڵگەوە هەموو ساختەكارییەكانی سندوقەكان و دەنگدانی تایبەتی ئاشكرا كردو بۆ ئەوەی ئەو كارانەیان بەسەردا ساغ نەبێتەوە هاتن سندوقەكانیان سوتاند".

ئەو پێشبینی دەكات سندوق و كۆگاكانی تری كۆمسیۆن بسوتێنرێن و دەڵێت: "ڕەنگە سندوقەكانی تریش لەكۆگانی تر، ئەوانیش بسوتێنن تا بتوانن بڵێن ئەوە ئەنجامەكان، ئەوە ئەمری واقیع پێویستە لەبەر گەل قبوڵی بكەن، لەكاتێكدا گەل لە كەمترین مافی بێ بەش كراوە، كە ئەویش بریتییە لەڕێزنەگرتن لەهەڵبژاردنی خۆیان بۆ ئەو دەسەڵات‌و كەسانەی خۆیان دەیانەوێت نوێنەرایەتیان بكات."

زەوبیعی وتیشی: "ئەوەی دوێنێ تایبەت بوو بە بەغدا لەناوچەی رەسافە، بەڵام لەدواتردا هەروەك پێشبینی دەكەین ئەمە سەرەتای زنجیرەیەك كاری هاوشێوە بێت لە شارەكانی تر و ناوچەی كەرخ و هەموو شوێنەكانی تر، هەتا لەهەرێمی كوردستانیش ، چونكە ساختەكاران بیروباوەڕ و ناسنامە و ڕەوشتیان یەكە، كە هەموویان خراپەكار و گەندەڵن، واتە ساختەكاران، هەمان ڕەوشت هەمان نەریتیان هەیە، هیچیان پێ گرنگ نییە جگە لەبەرژەوەندییەكانیان نەبێت ئەگەڕچی وێرانكردنی وڵاتیش بێت، ئەوانە تۆڕێكی گەورەن بۆ مانەوە، یاخود گەیشتن بەدەسەڵات هەموو كارێكی نایاسایی دەكەن."

سەرۆكی لیستی هاوبەندی بڕیاری عێراقی ڕەتیكردەوە دەستی وڵاتانی دەرەكی لەپشت ئەو كارەبن، كە وەك خۆی وتی بەرنامە بۆ داڕێژراوبوو "نەخێر ئەمە بابەتێكی ناوخۆییە، ئەوە پێویستی بە دەستی دەرەكی نییە، خراپەكاران و گەندەڵكارانی ناوخۆیی لەهەموو دەستێكی دەرەكی تر كارەساتبارترن خۆیان لەوبارەیەوە پێویستیان بەهاوكاری دەرەكی نییە."

هەروەها ڕونیشیكردەوە ، "ساختەكاران" ناسراون، هەموو ئەو هێزە سیاسیانەن ، كە زۆرترین ڕێكەوتنیان لەگەڵ كۆمسیۆن كردووە، چونكە كۆمسیۆن گوزارشت دەكات لەو چەند كەسەی، كە ساختەكاریان بۆ ئەو لایەنانە كرد، دواتر بەڕاستی نەخشەكان و ئاماژەكانیان وادەردەكەون دەستیان كردووە بەم كاری سوتاندنە ئەمەش لەپێناوی سەپاندنی ئەو دۆخەی هەیە بەسەرماندا و خواردنی مافی گەلی عیراق.

لەوەڵامی ئەو پرسیارەی هەڵوێستیان چی دەبێت ؟ تەڵال زەوبیعی وتی: "هەموو كۆگاكان نەسوتاوە ئەوە بەشێكی بچوك بو، بەڵام ئەمە ئاماژەیە، ئەمە واتای تری نیە جگە لەو مەبەستەی ساختەكاران كەباسم كرد بۆ سەپاندنی ئەمری واقیع بەسەرماندا، بەڵام هەروەك دەڵێن بۆ هەموو ڕوداوێك قسەی خۆی لەكاتی خۆیدا دەبێت ئێمەش چاوەڕێین دەبێت دەزگا ئەمنیەكان ئەوە ساغ بكەنەوە كێ لەپشت ئەم كارەوەیە؟".

پێشتر سەعدی پیرە وتەبێژی فەرمی یەكێتی نیشتمانی كوردستان بەدەنگی ئەمریكای ڕاگەیاندبوو "ئەگەری سەرهەڵدانی فیتنەیەكی گەورە لەعیراقدا هەیە"، هەروەها چەند لایەنێكی سیاسی عێراق هەمان هۆشدارییان دابوو، بەڵام تەڵاڵ زەوبیعی دەڵێت: "ساختەكاران و گەندەڵكاران خۆیان فیتنەن، فیتنەی گەندەڵی گەورەترە لە فیتنەی كوشتن،  گەندەڵی لەسەر زەوی لەبەرزترین پلەی فیتنەیە ، وە دواتر هەركەس و لایەنێك لەسەر سەرهەڵدانی فیتنە قسە دەكات ئەوە خۆی هۆكار و ئامڕازی فیتنەیە."

زیاتر پیشان بدە

بابەتی پەیوەندیدار

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *