بیروڕا

قۆناغی نەیارێتی..!

عەدالەت عەبدوڵڵا

چاوەڕوانكراوە، كە پەیوەندیی نێوان یەكێتی‌و كۆمەڵێك هێزی تر لەهەرێمدا، لەدەورانی ركابەرییەوە بچێتە قۆناغی نەیارێتی. ئەم قۆناغە، بەسادەیی، وا كەوتۆتەوە كە، بریتی بێت لەقۆستنەوەی هەموو هەل‌و دەرفەتێك بۆ لێدان لەبەرامبەر!. هەندێ هێز، زیاتر رۆیشتوون‌و وشەی «نابوتكردن»یان جاڕداوە!، ئەمەش، بەئاشكرا، دەرگای قۆناغی نەیارێتی، رادیكاڵانەتر، خستۆتەسەر پشت!.

 

وا دەردەكەوێت كە ئەوەی تائێستا، بەهۆی بیرۆكەی «یەكڕیزی»یەوە، نەچۆتە ناو ئەم قۆناغەوە، یەكێتی-یە. ئەم هێزە، تائێستاش، لەئاستی باڵادا، لەوە دەكۆڵێتەوە كە تا چەند مومكینە پێچەوانەی ئەم قۆناغە سیاسەت بكات!، واتە لەجیاتی نەیارێتی، یەكڕیزیی؛ بخوڵقێنێت؟!.
 
ئەم خواستە، وەك پرەنسیپ، رەوایە. كورد، لەباشوور بێت، یان هەر بەشێكی تر، لەگرەوكردن لەسەر وزەی نیشتمانیی خۆی بەولاوە، ناتوانێ پشت بە هێزی دەرەكی ببەستێت بۆ ئەوەی دۆزی كورد پێشبخات، بەڵام ئەم ئیرادەیە، لەڕوانگەی واقعی باشوورو ململانێی نێوان هێزەكانییەوە، زیاتر لەدروشم دەچێت!، چونكە گروپە ركابەرەكان بەلایدا ناچن!، ئەوان، بابەتی یەكڕیزیی لەبەرنامەیاندا نییە، بگرە گفتوگۆش رەتدەكەنەوە!.
 
كەواتە، یەكێتی، لەناو دیمەنی سیاسیدا، بۆ لەمەودوا، خۆی بەهەڵەدا دەبات كە، زیاد لەپێویست، شوێن بیرۆكەی یەكڕیزیی؛ بكەوێت، لەوەش هەڵەتر سڕكردنی تواناكانی خۆیەتی لەئاست قۆناغی نەیارێتی، كە گروپەكانی تر دەستیانپێكردووەو بەئاشكرا، تاڕادەی هاوئاهەنگی لەگەڵ نەیاراندا، رۆیشتووە!: هاوئاهەنگی لەگەڵ گروپە دەمارگیرەكانی عەرەب، كە تەنها لەماوەی (8) مانگی قەڵەمڕەوییاندا لەكەركوك، دەستیان بەعەرەبكردنەوە كردۆتەوە، لەگەڵ گروپە توركمانەكانیش، كە لەئەنكەرەوە رێنومایی وەردەگرن (هەر ئەمساڵ دوو جار دەزگای هەواڵگریی تورك MIT چۆتە ناو كەركوكەوەو چەندین كۆبوونەوەش لەوێ‌و لەئەنكەرە ئەنجامدراون!).
 
روونتر، لەسیاسەتدا، نابێ دروشمی ناكارا بەرز بكەیتەوە تەنانەت ئەگەر، لەڕووی مەبدەئیشەوە، ئامانجی باڵای وڵاتیشی تێدابێت!. هەندێجار، رەنگە، بەمیكانیزمی تر، ئەو ئامانجە بێتەدی. كاتێك بەرامبەرەكانت بڕیاری دەستپێكردنی قۆناغێك لەململانێیان دابێت كە قۆناغی نەیارێتییەو ئەم جۆرەش لەململانێیان كردبێتە یاسای پەیوەندی‌و مامەڵە، ئەوا ئەوسا ئیتر هەموو خۆدوورگرتنێك لەلۆژیكی ململانێ بەهەمان یاسای سەپێنراو، جگە لەلاوازی بەهیچی تر ناخوێنرێتەوە!، بەتایبەتی ئەگەر هێزی بەڕێوەبردنی تۆ بۆ ئەو فۆرمە لەململانێ، چەند هێندەی بەرامبەرەكانت بێت‌و بێ بەرامبەر (مجانی) سڕت كردبێت!.
 
لەسیاسەتدا، تەنها ئەو یاسایە بۆ ململانێ ئەیباتەوە كە هەڵوێستی ململانێكارانی تێدا لاواز دەرنەكەوێت، یان، لانیكەم، وەها لێكنەدرێتەوە كە لایەنێكی ناو هاوكێشەكە لەپێگەیەكی لاوازدایە!، دەنا، پێش ئەوەی «لاوازبوون» واقع بێت یان گریمانە، لەڕێگەی جەنگی دەروونی‌و فۆرمە جیاجیاكانی پڕوپاگەندەی سیاسییەوە، زەبری گەورەت لێدەدرێت!.
 
كە یاسای ململانێ گەیشتە قۆناغی نەیارێتی، دەیانجار دەستی دۆستایەتی درێژبكەیت، تەنها یەك مانا زاڵ دەكرێت، ئەویش وێناكردنتە وەك هێزێكی لەرزۆك‌و لاواز!، پرسیاریش ئەوەیە: ئایا ئەم هێزە، ئەم وێناكردنەی قبوڵە كە پێچەوانەی ناسنامەیەتی، یان نەخێر، دێتەوە ناو واقع‌و سەودای پێویست لەگەڵ ئەم قۆناغە جیاوازەدا دەكات؟!.
لەڕوانگەی شیكاریی سیاسییەوە، مامەڵەی گونجاو بۆ یەكێتی، تەنها ململانێكردنە بەهەمان یاسا كە ئەوانیتر سەپاندویانە!، ئەویش بەمانۆڕی سیاسی‌و هەندێ رەگەزی ماكیاڤیلییانە، بەڵام بێ توندوتیژی‌و بەئامانجی جیاواز، بە ئامانجی ئەوەی، بەتاقیكردنەوە، زیانەكانی قۆناغی نەیارێتی بۆ هەمووان دەربكەوێت!، ئەو زیانانەش، هەر خۆیان، یاسای ململانێكە، بگۆڕن!. 
زیاتر پیشان بدە

بابەتی پەیوەندیدار

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *